ПРАКТИЧНИ СОВЕТИ: Како да отстраните мирис на лук од рацете

Лукот и кромидот имаат интензивен и иритирачки мирис кој најчесто трае многу подолго од готовиот оброк. Мирисот знае да се задржи долго на рацете, а особено во делот околу ноктите.

Доколку ви смета овој мирис, пробајте некои од овие совети.

1. Рацете тријте ги со лажичка или друг прибор од нер’ѓосувачки челик под млаз ладна вода околу 1 минута. Се смета дека молекулите кои се одговорни за мирисот реагираат во допир со металот и се неутрализираат.
2. Помешајте сол со малку вода додека не се направи паста. Истријте ги рацете со оваа паста, измијте ги и исушете ги. Пастата дополнително ќе направи и пилинг на рацете. Не заборавете да ставите крем после миењето. Доколку немате сол, пробајте и сода бикарбона, шеќер или мелено кафе. Во случај да имате рана на раката избегнувајте сол.
3. Натопете ги рацете во сок од домат најмалку 5 минути. Измијте ги со средство за перење садови и ладна вода.
4. Исцедете лимонов сок. Натопете ги рацете околу 3 минути, а потоа измијте ги. Доколку немате лимон, може и оцет или течност за испирање уста.
5. Можете да искористите и кора д портокал со која ќе ги триете прстите од 2-3 минути.
6. Истријте ги прстите со путер од кикиритки или со паста за заби.

Кога миете раце користете ладна вода. Топлата вода ги отвора порите во кои се вовлекува непријатниот мирис.

Можете да користите и хируршки ракавици.

Во некои продавници можат да се најдат и метални сапуни кои помагаат во отстранување на непријатните мириси на рацете.