Оваа фантастична крем супа од зеленчук е приготвена по рецепт на Шеф Никола Мишковски од ресторан Камник, аза време на часовите по готвење во рамки на проектот Кулинари.
Состојки:
- 1 морков
- 100 гр тиквици
- 1 пиперка
- 50 гр пченка
- 50 гр грашок
- 1 л вода
- 100 мл млеко
- 1 лажица брашно
- магдонос
- 100 мл масло за јадење
За подготовка на ова јадење потребно е и длабоко тенџере, лажица за мешање, кутлача и длабок сад за сервирање.
Начин на подготовка:
- Го подготвувате зеленчукот: првин ги сечкате морковот, тиквицата и пиперката на коцкички (важно: кога правите супа од зеленчук, важно е сите зеленчуци да ги исечкате во приближно иста големина, за да се зготват рамномерно)
- Потоа загревате тенџере со масло за јадење. Откако добро ќе загрее првин го додавате морковот (бидејќи потребно му е најмногу време за обработка), потоа ги додавате пиперката и тиквицата и пропржувате додека не омекнат. Следно: ги додавате грашокот и пченката, промешувате и пропржувате 1 минута. Потоа го додавате брашното кое служи да се сврзат зеленчуците. Повторно промешувате.
- Во овој чекор во тенџерето додавате 1 литар вода. Откако ке почне да врие го додавате и млекото и го намалувате огнот. Варите на средна температура 20-тина минути.
- Зачинувате по вкус со сол и бибер.
- Вака приготвената крем супа од зеленчук ја сервирате во длабока чинија со ситно сечкан магдонос, бибер или лимон – изборот е ваш.
Добар апетит!
Повеќе информации за часовите за готвење во рамките на проектот кој го спроведува Здружението за социјални иновации „АРНО“ прочитајте тука: https://gotvi.mk/2016/04/28/naucete-da-gotvite-so-profesionalni-gotvaci/. За начинот на пријавување на часовите по готвење кои се одржуваат во средното училиште за угостителство и туризам „Лазар Танев“ повеќе детали прочитајте тука: https://www.facebook.com/coolinari.mk/
Прочитај поврзани Gotvi.mk вести:
Салата со брокула која ќе ја правите секој ден
Телешко месо во сос од буковка